கடுவெளி ( kaduveLi )

தொல்காப்பியம் : எழுத்ததிகாரம் : 2 : மொழி மரபு : 3 : எழுத்துகள் மொழியாதல்

2008-07-07T08:49:00.000-07:00

10 : நெட்டெழுத்து ஏழே ஓரெழுத்து ஒரு மொழி

உயிர் நெடில் ஏழும் ஓரெழுத்து ஒருமொழியாய் வரும்.
(எ.கா)
ஆ : பசு
ஈ : கொடு
ஊ : உணவு
ஏ : கூர்மை
ஐ : தலைவன்
ஓ : ஓசை
கௌ : கவ்வுதல்

11 : குற்றெழுத்து ஐந்தும் மொழிநிறைபு இலவே

உயிர்க்குறில் ஐந்தும் ஒரு மொழியாகும் இயல்புடையன அல்ல

12 : ஓரெழுத்து ஒருமொழி ஈரெழுத்து ஒருமொழி
இரண்டிறந்து இசைக்கும் தொடர்மொழி உளப்பட
மூன்றே மொழிநிலை தோன்றிய நெறியே

மொழி மூவகைப்படும். ஓரெழுத்து ஒருமொழி (ஆ), ஈரெழுத்து ஒருமொழி ( மணி), இரண்டிற்கும் மேற்பட்ட எழுத்துகள் தொடர்ந்து வரும் மொழி (ஆண்டு, ஆடவர் )

செல்வி ஷங்கர் 07072008

தொல்காப்பியம் : எழுத்ததிகாரம் : 2 : மொழி மரபு : 2 : அளபெடை

2008-07-07T08:31:00.000-07:00

08: குன்றிசை மொழிவயின் நின்றிசை நிறைக்கும்
நெட்டெழுத்து இம்பர் ஒத்தகுற் றெழுத்தே

சொல்லின் ஓசை குறைந்த இடத்து அதன் ஈற்றில் நெட்டெழுத்திற்குப்பின் அதற்கு இனமான குற்றெழுத்து நின்று ஓசையை நிறைவு செய்யும். அது அளபெடை எனப்படும். (எ.கா) ஆஅ, ஈஇ, ஊஉ, ஏஎ, ஓஒ

09 : ஐ ஔ என்னும் ஆயீர் எழுத்திற்கு
இகரம் உகரம் இசைநிறை வாகும்

ஐ ஔ என்ற இரண்டு நெட்டெழுத்திற்கும் அதன் ஈற்றில் இகரமும் உகரமும் இனமாய் நின்று ஓசையை நிறைவு செய்யும். (எ.கா) ஐஇ ஔஉ

செய்யுளில் ஓசை குறைந்த இடத்து நெட்டெழுத்து ஏழும் தன் மாத்திரையில் இருந்து நீண்டொலிப்பது அளபெடை எனப்படும்.
அளவு + எடை - அளவு நீண்டொலித்தல்.

(எ.கா) உழாஅர் ( உழமாட்டார்)

செல்வி ஷங்கர் 07072008

தொல்காப்பியம் : எழுத்ததிகாரம் : 2 : மொழி மரபு : 1 : சார்பெழுத்துகள் தொடர்ச்சி

2008-06-29T02:22:00.000-07:00

04 : இடைப்படில் குறுகும் இடனுமார் உண்டே
கடப்பாடு அறிந்த புணரியல் ஆன

குற்றியலுகரம் தனி மொழியில் மட்டுமின்றி புணர் மொழியின் இடையே தோன்றினாலும் தன் அரை மாத்திரையிலிருந்து குறுகி ஒலிக்கும்.
எ.கா : ஆடு, பாடு, ஆடுகளம், பாடுபொருள்

05 : குறியதன் முன்னர் ஆய்தப் புள்ளி
உயிரொடு புணர்ந்த வல்லாறன் மிசைத்தே

ஆய்த எழுத்து உயிர்க்குறில் முன்னும் வல்லின உயிர்மெய்க் குறில் பின்னும் வர இடையே பயின்று வரும்.
எ; கா : எஃகு, கஃசு, அஃது, இஃது

06 : ஈறியல் மருங்கினும் இசைமை தோன்றும்

நிலைமொழி ஈறும் வருமொழி முதலும் புணரும் போதும் அரை மாத்திரையே ஒலிக்கும்.
எ, கா : அஃறிணை, முஃடீது ( அல் + திணை, முள் + தீது)

07 : உருவினும் இசையினும் அருகித் தோன்றும்
மொழிக்குறிப்பு எல்லாம் எழுத்தின் இயலா
ஆய்தம் அஃகாக் காலை யான

உருவின் கண்ணும் ஒலியின் கண்ணும் சிறுபான்மை ஆய்தம் தோன்றும். பொருளுடைய சொல்லும் அவை அல்லாத மொழிகளும் மெய்யெழுத்துகள் போல் அரை மாத்திரையும், சிறுபான்மை மிகுந்தும் ஒலிக்கும். இவை ஆய்தம் சுருங்கா எழுத்துச் சொற்களாகும்.
எ. கா : கஃறு, சுஃறு ( உரு, ஒலி )

இவை போன்ற சொற்கள் நடைமுறையில் பயன் படுத்துவது இல்லை. ஆகையினால் இவை புதுமையாக இருக்கும். இயன்ற வரை நடைமுறைச் சொற்கள் எடுத்துக்காட்டாகத் தர முயல்கிறேன்.

தொடரும் ...... செல்வி ஷங்கர் 29062008

தொல்காப்பியம்-எழுத்ததிகாரம்: 2 : மொழி மரபு: 1: சார்பெழுத்துகள்

2008-06-26T08:21:00.000-07:00

01 : குற்றிய லிகரம் நிற்றல் வேண்டும்
யாவென் சினைமிசை உரையசைக் கிளவிக்கு
ஆவயின் வரூஉம் மகரம் ஊர்ந்தே

ஒரு மொழிக் குற்றியலிகரம் மியா என்னும் அசைச்சொல்லில் யாகாரத்திற்கு முன் மகர மெய்யின் மீது ஊர்ந்து வரும்.

(எ.கா) : கேண்மியா, சென்மியா ( கேளுங்கள், செல்லுங்கள் என்பது பொருள்)

02 : புணரியல் நிலையிடைக் குறுகலும் உரித்தே
உணரக்கூறின் முன்னர்த் தோன்றும்.

சொற்புணர்ச்சியின் இடையே குற்றியலுகரம் யகரத்தின் முன்னே இகரமாய்த் திரிந்து குறுகி ஒலித்தலுமுண்டு.

(எ.கா ) : நாடியாது, குரங்கியாது ( நாடு + யாது -
ட் + உ = டு
ட் + இ = டி
நாடியாது)

03 : நெட்டெழுத்து இம்பரும் தொடர்மொழி ஈற்றும்
குற்றியலுகரம் வல்லாறு ஊர்ந்தே

குற்றியலுகரம் வல்லின மெய்கள் ஆறின் மீதும் ஊர்ந்து நெட்டெழுத்தின் பின்னும் ஐவகைத் தொடர்மொழியின்
ஈற்றிலும் நிற்றல் வேண்டும்.

(எ.கா) :
நாடு : நெடில் தொடர்
அழகு : உயிர்த் தொடர்
பாட்டு : வன்தொடர்
பஞ்சு : மென்தொடர்
மார்பு : இடைத் தொடர்
எஃகு : ஆய்தத் தொடர்

தொடரும் ...... செல்வி ஷங்கர் - 26082008

தொல்காப்பியம் 06 -- எழுத்ததிகாரம் - பிற மரபுகள்

2008-06-23T00:09:00.000-07:00

31 அ இ உ அம் மூன்றும் சுட்டு.

அ இ உ -என்ற இம்மூன்றும் பெயரைச் சார்ந்து வரும் சுட்டெழுத்துகளாகும். .
உ என்பது தற்போது வழக்கிலில்லை.

எ.கா : அது இது உது

அச்சிறுவன், இப்பெண், அவ்விடம், இவ்விடம், அப்பொருள், இப்பொருள்,
அக்காலம், இக்காலம், அவ்விலை, இவ்விதழ், அச்சிறப்பு, இப்புகழ்

32 ஆ ஏ ஓ அம் மூன்றும் வினா.
ஆ, ஏ, ஓ என்ற மூன்றெழுத்துகளும் வினா எழுத்துகளாக வரும்.

எ.கா : அவனா?, ஏன்?, ஏது?,அவளோ ?

ஆ ஏ ஓ என்று வினவுப் பொருளில் பயன்படும் என்றால், அவை சொற்களின் இறுதி ஒலியாக ஒலிக்கும் என்பது சூத்திரத்தால் சுட்டப்படும் விதி.

அவனா, அவனோ என்பன போலவே,

அப்படியும் ஆனதே?

போனதும் உண்டே?

என்றெல்லாமும் வினா வகைகள் வழக்கில் இருந்தன. அப்படி வினா எழுப்பும் வழக்கம் இப்போது அருகிவிட்டது என்றாலும்,

'ஏண்டா இப்படி மொறைக்கற? இப்ப என்ன சொல்லிட்டேன்? எதுக்கு இவ்ளோ கோவம்?'

'பின்னே? நான் இவ்ள நேரம் இங்க காத்திட்டிருக்கேன்... என்னப் பாக்கவே பாக்காம பராக்குப் பாத்துட்டிருந்தா?'

இந்த உரையாடலில், 'பின்னே?' என்ற இடத்தில் ஏகாரம் வினாவாக எழுகிறது அல்லவா, அதுபோன்ற இடங்களில் சிலசமயங்களில் தற்போதும் ஏகாரம் வினாவாகப் பயன்படுவது உண்டு.

ஏன் ஏது என்ற எடுத்துக்காட்டுகள் இங்கே பொருந்தா. மொழியீற்று ஒலிகள் அவை. (அதாவது ஒரு வார்த்தைக்குக் கடைசியில் ஒலிக்கும் ஒலி.) ஏன், ஏது என்பன வார்த்தையின் தொடக்கத்தில் ஒலிக்கும் ஒலிகள்.

33 அளபு இறந்து உயிர்த்தலும் ஒற்று இசை நீடலும்
உள என மொழிப இசையொடு சிவணிய
நரம்பின் மறைய என்மனார் புலவர்.

எழுத்துகள் தமக்கு விதிக்கப்பட்ட மாத்திரை அளவு கடந்து
ஒலித்தலும்,ஒற்றெழுத்துகள் தம் மாத்திரையிலிருந்து நீண்டொலித்தலும்
உண்டு.

விளித்தல் பொருளிலும் இசைப்பாடலிலும் இவ்வாறு ஒலிக்கும் என்று புலவர்
கூறுவர்.

எ.கா :கெடுப்பதூஉம், எடுப்பதூஉம், கலங்ங்கு, இலங்ங்கு, உழாஅர்.

பாடல்களில் எழுத்துகள் நீண்டு ஒலிப்பதுமுண்டு.

இத்துடன் எழுத்ததிகாரம் - நூன்மரபு முற்றுப் பெறுகிறது.

அடுத்து - மொழி மரபு.

பி.கு : விளக்கத்துடன் உதாரணமும் தந்து உதவும் ஹரியண்ணா மற்றும் செல்வி ஷங்கர் இருவருக்கும் நன்றிகள் பல :

தமிழ் - கேள்விகள் ஆயிரம்?

2008-06-22T02:50:00.000-07:00

சுமார் 2500 ஆண்டுகளுக்கு முன் எழுதப்பட்டது என்று கருதப்படும் "தொல்காப்பியம்'தான் இன்று நமக்குக் கிடைத்திருக்கும் தமிழ் நூல்களிலேயே முதல் நூல் என்று சொல்ல வேண்டும். "தொல் காப்பியத்திற்குப் பொருளுரை வழங்கியோர் பலர்.

அவற்றுள், சமீபத்தில் வெளியாகி நம்மைப் பாராட்ட வைக்கும் உரைகள் இரண்டு. முதலாவது, பாரதிதாசன் பல்கலைக் கழகத் தமிழ்ப் பேராசிரியர் முனைவர் கி. இராசாவின் பொருளுரையுடன் வெளி வந்திருப்பது. மூன்று பகுதிகளாக, மிகவும் எளிமையாக, வனப்பான புத்தக அமைப்புடன் வெளியிடப்பட்டிருக்கும் இந்தப் பதிப்பு, பார்த்ததும் படிக்கவும், படித்ததும் தேர்ந்து தெளியவும் வழிகோலும் வகையில் மைந்திருப்பதுதான் அதன் சிறப்பு.

இன்னொரு பதிப்பு தமிழண்ணலுடையது. மீனாட்சி புத்தக நிலையத்தாரின் கையடக்கப் பதிப்பு. தமிழண்ணலின் உரை விளக்கம் எனும் போது அதைப் பற்றி கருத்துக் கூற வும், அதை எடை போடவும் அடியேனுக்கு அருகதை இல்லை. தமிழ் கூறு நல்லுலகத்தின் மதிப்புக்கும் மரியாதைக்கும் உரிய தமிழறிஞர் தமிழண்ணல். மூலத்துக்கு மெருகேற்றும் அவரது உரை விளக்கம்.

***********************************************************

ஒரு புறம் செம்மொழி மையம் காண்கிறோம்; தமிழாராய்ச்சி, தமிழ்ப் பல்கலைக் கழகம் என்றெல்லாம் உருவாக்கித் தமிழ் பரப்புவதாகச் சொல்கிறோம்.

"எங்கும் தமிழ், எதிலும் தமிழ்' என்கிற கோஷம் ஆங்காங்கே விளம்பரப் பலகைகளாகக் கண்ணில் தட்டுப்படுகிறன. தமிழ் பாட மொழியாகிறது, கட்டாயமாகத் தமிழ் படித்தே தீர வேண்டும் என்றெல்லாம் அரசு தரப்பு அறிவிப்புகள் வருகின்றன.

இந்தச் செய்திகள், ஒருபுறம் மகிழ்ச்சி அளித்தாலும், யதார்த்த உண்மை சுடுகிறது. தமிழ்கூறு நல்லுலகத்தில் தமிழுக்கு உண்மையிலேயே வரவேற்பு இருக்கிறதா?

நம்மவர்கள் நிஜமாகவே தமிழுணர்வுடன் தான் அன்றாட வாழ்க்கையில் இருக்கிறார்களா?

மனசாட்சியைத் தொட்டு இந்தக் கேள்விக்கு "ஆமாம்' என்று யாராவது பதிலளித்துவிட முடியுமா?

எங்கே தமிழ்?

எதிலே தமிழ்?

வீட்டில் அம்மா அப்பாவைக் கூட தமிழில் அழைப்பதில்லை நம்மில் பலர். அது போகட்டும். தமிழுணர்வு உடைய நம்மில் ஒருவர் வசதி வாய்ப்பு இருந்தும் தத்தம் குழந்தைகளைத் தமிழ்க் கல்விபெற அனுப்புகிறார்களா?

தமிழ்வழிக் கல்வி, தமிழ் பாடமொழி, தமிழுணர்வு இவையெல்லாம் ஊருக்கு உபதேசமாகத் தொடர்கிறதே தவிர, அழுத்தமான உணர்வாக, கொள்கைப் பிடிப்பாக இருக்கிறதா என்றால் இல்லை.

இப்போது தமிழ்வழிக் கல்வி என்றாலே வேலையில்லை என்கிற நிலைமை. தமிழை சிறப்புப் பாடமாக எடுத்து பட்டம் மற்றும், முதுகலைப் பட்டம் பெற்றால் ஆசிரியராக மட்டும்தான் வேலை கிடைக்கும் என்கிற நிலைமை. தமிழ்க் கல்லூரிகளில் சேர்வதற்கு யாரும் தயாராக இல்லை. அதைப் பற்றி ஆட்சியாளர்கள் ஏன் சிந்திப்பதில்லை?

இந்திப் பிரசார சபை போல, தமிழ் பிரசார இயக்கம் தொடங்கினால் என்ன?

ஆங்கிலக் கல்வி பெறும் தமிழ் குழந்தைகளுக்கு இலவசமாகத் தமிழ் கற்றுக் கொடுக்க ஏன் முயற்சிகள் எடுக்கப்படுவதில்லை?

தமிழில் படித்தால்தான் அரசு வேலை என்கிற உத்திரவாதம் ஏன் அளிக்கப்படுவதில்லை?

தமிழனுக்குத் தமிழுணர்வு ஊட்ட வேண்டிய அவலமும், தமிழ் கற்றுக் கொடுக்க வேண்டிய துர்பாக்கியமும் ஏற்பட்டிருக்கிறதே, அதை நினைத்தால் வெட்கித் தலைகுனிய நேர்கிறது. சிந்தித்து செயல்பட வேண்டியவர்கள் சிந்திப்பார்களா....?

நன்றி - தினமணி

தொல்காப்பியம் 05 -- எழுத்ததிகாரம் - மயக்கம்

2008-06-18T08:33:00.000-07:00

தொல்காப்பியம் -- எழுத்ததிகாரம் - மயக்கம்.
---------------------------------------------------------
22 : அம் மூ ஆறும் வழங்கு இயல் மருங்கின்
மெய்ம்மயக்கு உடனிலை தெரியுங் காலை.
அந்த மூவாறு பதினெட்டு மெய்யெழுத்துகளும் தாம் மொழியில் வருமிடத்து, தனி மெய்யெழுத்து, தன் முன்னர் நின்ற பிற மெய்யோடும், தம் மெய்யோடும் மயங்கும். உயிர்மெய் உயிர்மெய்யோடும் மயங்கும். இவ்வாறு மெய்ம்மயக்கம் இரு வகைப்படும்.

தனி மெய் பிற மெய்யுடன் மயங்கும் முறை.

23 : ட ற ல ள என்னும் புள்ளி முன்னர்க்
க ச ப என்னும் மூவெழுத்து உரிய.
ட ற ல ள என்று சொல்லப்படும் நான்கு மெய்ய்யெழுத்துகளின் முன்
க ச ப என்னும் மூன்று எழுத்துகளும் வந்து மயங்கும்.
எ.கா :
கட்க, கற்க, கற்ப, செல்க, செல்ப, கொள்ப

24 : அவற்றுள்
ல ள ஃகான் முன்னர் ய வ வும் தோன்றும்
லகர ளகர மெய்யெழுத்துகளின் முன்னர் யகர வகரங்கள் வந்து மயங்கும்.
எ.கா :
செல்வம், கள்வன், வெள்யாறு, கொல்யானை

25 : ங ஞ ண ந ம ன எனும் புள்ளிமுன்னர்
தத்தம் இசைகள் ஒத்தன நிலையே.
ங ஞ ண ந ம ன என்ற மெய்யெழுத்துகளின் முன் க ச ட த ப ற என்னும் இன மெய்யெழுத்துகள் மயங்கி நிற்றலுமுண்டு.
எ.கா :
கங்கன், கஞ்சன், கண்டன், கந்தன், கம்பன், மன்றம்

26 : அவற்றுள்
ண ன ஃகான் முன்னர்
க ச த ப ம ய வ ஏழும் உரிய.
ணகர னகரங்களின் முன் ட ற என்னும் எழுத்துகளே அல்லாமல்
க ச த ப ம ய வ என்னும் ஏழு எழுத்துகளும் வந்து மயங்கும்.
எ.கா :
புன்செய், அன்பு, வன்மை, பண்பு, வெண்மை

27 : ஞ ந ம வ என்னும் புள்ளி முன்னர்
யஃகான் நிற்றல் மெய் பெற்று அன்றே.
ஞ ந ம வ என்னும் மெய்யெழுத்துகளின் முன்னால் யகரம் மயங்கி நிற்றலும் இயைந்து நிற்றலும் உண்டு.

28 : மஃகான் புள்ளிமுன் வவ்வும் தோன்றும்.
மகர மெய்யின் முன்னால் வகர மெய்யும் தோன்றும்.

29 : ய ர ழ என்னும் புள்ளி முன்னர்
முதலாகு எழுத்து ஙகரமொடு தோன்றும்.
ய ர ழ என்னும் மெய்யெழுத்துகளின் முன் மொழிக்கு முதலாகும் ஒன்பது மெய்யெழுத்துகளும் ஙகரத்தோடு தோன்றி மயங்கும்.

தனி மெய் தன் மெய்யோடு மயங்குமாறு .

30 : மெய்ந்நிலை சுட்டின் எல்லா எழுத்தும்
தம்முன் தாம் வரும் ர ழ அலங்கடையே.
எல்லா மெய்யெழுத்துகளும் ர ழ அல்லாத இடத்து தம் முன் தாம் வந்து மயங்கும்.
எ.கா :
அம்மை, காக்கை, பச்சை, மஞ்ஞை, மண்ணை, கன்னி, தத்தை
-------------------------------------------------------------------------------------------------
பதிவர் குறிப்பு :
பொதுவாக இலக்கண நூற்பாக்களைப் படிக்கும் போது நடைமுறைச் சான்றுகள் காட்டப் பெறின் எளிதாக உணர்வோம். ஆனால், இது இலக்கணம் என்று தெரியாமலேயே நாம் வழங்கி வரும் மொழி நடையில் அவை அமைந்து விடுகின்றன. அதனால் இலக்கணத்திற்குக் காட்டப் பட்ட எடுத்துக் காட்டுகள் நமக்குப் புதுமையாய்த் தோன்றும். அவை பழக்கத்தில் வரும் போது இயல்பாய் விடும்.

செல்வி ஷங்கர்: 18..06.2008

30 :

தொல்காப்பியம் - எழுத்ததிகாரம் - 4

2006-07-20T10:08:00.000-07:00

தொல்காப்பியம் - எழுத்ததிகாரம் - 4

மகரக் குறுக்கம் :

13 :

அரையளவு குறுகல் மகரம் உடைத்தே
இசையிடன் அருகும் தெரியுங் காலை

வேறோர் எழுத்தினது ஓசையினால் மகர ஒற்று தன் அரைமாத்திரையில் இருந்து குறைந்து கால்மாத்திரையாக மாறிவிடும்.
உதாரணத்துக்கு "போன்ம், வரும் வண்ணக்கண்" இது பெரும்பன்மையான வழக்கிலில்லை..

எழுத்துகளின் வரிவடிவம்:

14 :
உட்பெறு புள்ளி உருவா கும்மே

"ம"கரம் எப்படி இருக்கவேண்டும் என்பது பற்றியது.

அதாவது ப என்ற எழுத்தின் உள் புள்ளி வைத்தால் அது " ம " என்ற எழுத்தாக பழங்காலத்தில் கருதப்பட்டு வந்தது. தற்போதைய வழக்கில் இல்லை.

15 :
மெய்யின் இயற்கை புள்ளியொடு நிலைய

மெய் எழுத்துகள் புள்ளியோடு இருக்கும்.

16 :
எகர ஒகரத்து இயற்கையும் அன்றே.

எ மற்றும் ஓ மெய்போலவே புள்ளி பெற்று வரும் என்பதாம். இப்போது வழக்கில் இல்லை.

17:
புள்ளியில்லா எல்லா மெய்யும்
உருவுரு வாகி அகரமோ டுயிர்த்தலும்
ஏனையு உயிரோடு உருவுதிருன் துயிர்த்தலும்
ஆயீ ரியல உயிர்த்தவாரே

மெய்யெழுத்துகள் "அ" வுடன் சேர்ந்தபோது புள்ளி நீங்கி அகரத்தோடு சேர்ந்து
ஒலிக்கும். மற்ற உயிரெழுத்துடன் சேரும் போது அதன் வடிவம் மாறி அந்த
உயிரெழுத்துடன் சேர்ந்து ஒலித்தலும் என இருவகையில் வரும்.

எ.கா :
க ங கா கீ கூ

18 :
மெய்யின் வழியது உயிர்தோன்று நிலையே

உயிர் மெய் எழுத்துகளில் ஓசை / ஒலியானது மெய்யெழுத்தின் ஓசை / ஒலி
முதலில் தோன்றி அதற்கு பிறகு

வல்லினம் / மெல்லினம் / இடையினம்

19 :
வல்லெழுத் தென்ப கசட தபற

20 :
மெல்லெழுத் தென்ப ஙஞணநமன

21 :
இடையெழுத் தென்ப யரல வழள

பழைய பாடம் தான் :)

கசடதபற வல்லினம்
ஙஞணநமன மெல்லினம்
யரலவழள இடையினம்
"யாருமிங்கே ஓரினம்"

அன்புடன்
ஐயப்பன்

தொல்காப்பியம் - எழுத்ததிகாரம் - 3

2006-06-28T10:35:00.000-07:00

7 - மாத்திரை

கண்இமை நொடிஎன அவ்வே மாத்திரை
நுண்ணிதின் உணர்ந்தோர் கண்ட ஆறே

கண்ணிமைத்தலின் நேரமும், கை நொடித்தலின் அளவும் ஒரு மாத்திரை என்னும் அளவு. இதுவே தெளிவாக கற்றவரின் வழி.

நுண்ணிதின் = தெளிவின்
ஆறு = வழி

***********************************
நன்னூல்:

மூன்றுயிர் அளபிரண் டாநெடில் ஒன்றே
குறிலோ டையெளக் குறுக்கம் ஒற்றள(பு)
அரையொற் றிஉக் குறுக்கம் ஆய்தம்
கால்குறல் மஃகான் ஆய்தம் மாத்திரை.

அளபெடுத்து வரும்போது உயிறளபடைக்கு மூன்று மாத்திரை
குறில் ஒரு மாத்திரை
ஐகார மற்றும் ஔகாரக் குறுக்கம் ஒரு மாத்திரை
ஒற்றளபடைக்கு ஒரு மாத்திரை

ஒற்றுக்கும், இ மற்றும் உ குறுக்கம் ( குற்றியலிகரம், குற்றியலுகரம்) ஆய்தம் இவற்றிற்கு அரை மாத்திரை.

மகரக் குறுக்கத்திற்கும் ஆய்த குறுக்கத்திற்கும் கால் மாத்திரை என்று நன்னூல் கூறுகிறது
****************************

8 - உயிர் எழுத்துக்கள்

ஔ கார இறுவாய்ப்
பன் ஈர் எழுத்தும் உயிர் என மொழிப

அ முதல் ஔ வரையிலான பன்னிரண்டு ( பன் ஈர் ) எழுத்துகளும் உயிர் எழுத்துக்கள் என மொழியப்படும்.

மெய்யெழுத்துக்கள்
9 - ன கார இறுவாய்ப்
பதின் எண் எழுத்தும் மெய் என மொழிப

க் முதல் ன் வரையிலான பதினெட்டு எழுத்துக்கள் மெய்யெழுத்துக்கள் என மொழியப்படும்.

10 - மெய்யோடு இயையினும் உயிர் இயல் திரியா

மெய்யொடு சேர்ந்தாலும் உயிரெழுத்துகளின் தன்மை வேறு படாது

11 - மெய்யின் அளபே அரை என மொழிப

மெய்யெழுத்தின் அளபு அரை மாத்திரையாகும்

12 - அவ் வியல் நிலையும் ஏனை மூன்றே

ஏனைய மூன்றுக்கும் ( சார்பெழுத்துக்கள்) அளபு அரை மாத்திரையாகும்

தொடரலாம் ...

தொல்காப்பியம் - எழுத்ததிகாரம் - 02

2006-06-23T11:43:00.000-07:00

01 - நூல் மரபு
________________________

முதல் எழுத்துக்கள்

01 . எழுத்து எனப் படுப
அகரம் முதல் னகரம் இறுவாய்
முப்பஃது என்ப
சார்ந்து வரல் மரபில் மூன்று அலங்கடையே.

---------------

எழுத்து எனப்படுவது அ முதல் ன வரையிலான முப்பது என்பர். சார்பு எழுத்து மூன்று அல்லாத இடத்தில்

அலங்கடை = அல்லாத இடம்

அன்புமணியின் Cologne Online Tamil Lexicon: Search Results

அலங்கடை = in places other than, except in the case of

சார்பு எழுத்துக்கள்

2 - அவைதாம்
குற்று இயல் இகரம், குற்று இயல் உகரம்
ஆய்தம் என்ர
முப்பால் புள்ளியும் எழுத்து ஓர் அன்ன

குறுகிய ஓசையுடைய இகரம், உகரம் மற்றும் மூன்று புள்ளியுடைய ஆய்தம் இவை எழுத்தை ஒத்து அமைவன.

அன்ன - such or similar things, impers. pl. are of th same kind, are similar, impers. pl. of finite appel; an appel. word of comparison

3 - குறில் எழுத்துக்கள்

அவைதாம்
அ இ உ எ ஓ என்னும்
அப்பால் ஐந்தும்
ஓர் அளபு இசைக்கும் குற்று எழுத்து என்ப

அ இ உ எ ஓ என்னும் ஐந்து எழுத்துக்களும், ஓர் அளபில் ( . measurement; 2. lengthening of the sound of a letter ) அதாவது ஒரு மாத்திரையில் ஒலிப்பவைகள் குறில் எழுத்துக்கள் எனப்படும்.

4 - ஆ ஈ ஊ ஏ ஐ ஓ ஔ என்னும்
அப்பால் ஏழும்
ஈர் அளபு இசைக்கும் நெட்டெழுத்து என்ப

ஆ ஈ ஊ ஏ ஐ ஓ ஔ என்னும் ஏழு எழுத்துக்களும் இரண்டு மாத்திரையில் ஒலிப்பவைகள் நெடில் எழுத்துக்கள் எனப்படும்.

5 - மூ அளபு இசைத்தல் ஓர் எழுத்து இன்றே

மூன்று மாத்திரை ஆளவில் எந்த எழுத்தும் ஒலிக்காது

6 - நீட்டம் வேண்டின் அவ் அளபு உடைய
கூட்டி எழூஉதல் என்மனார் புலவர்

ஒலி அதிகம் தேவைப் பட்டால் அந்த மாத்திரையளவிற்கு தேவையான எழுத்து ஒலிகளை கூட்டி எழுப்புதல் என்று புலவர்கள் கூறுவர்,

.

******

தொடரலாம்

எழுத்ததிகாரம் - 01

2006-06-23T10:51:00.000-07:00

வணக்கம்.

இந்த வலைப்பூ முழுவது தொல்காப்பியர் எழுதிய தொல்காப்பியத்தை அடிப்படையாகக் கொண்டது. தவறு கண்ட நேரம் சுட்டிக் காட்ட தயங்காதீர்கள். தொல்காப்பியம் இலக்கண நூல். அகத்தியரின் சீடன் தொல்காப்பியர் என்றும் கூறுவர். இன்று அகத்தியர் எழுதிய அகத்தியம் கிடைப்பதில்லை. இதை இங்கே பதிப்பதன் நோக்கம் பிறருக்கு கற்றுத் தர அல்ல. இதைப் பதிக்கும் நோக்கிலாவது அதை படிக்க முடியுமே என்ற எண்ணம் தான். ஒருமுறை எழுதுதல் பல முறை படித்தல் என்ற வகையிலே இதை இங்குப் பதிக்க ஆரம்பித்துள்ளேன். மதுரை தமிழிலக்கிய மின்பதிப்பு திட்டத்திற்கு என் நன்றிகள் பல . வார்த்தைகளுக்கு பொருள் வேண்டி நான் உபயோகிக்கும் அகரமுதலி http://www.ee.vt.edu/~anbumani/tamildict/ . அன்புமணி அவர்களுக்கும் என் நன்றிகள் பல .

தொல்காப்பியம் :

தொல்காப்பியம் என்பது இன்று கிடைக்கப்பெறும் மிகப் பழைய தமிழ் இலக்கண நூலாகும். இதை எழுதியவர் தொல்காப்பியர் எனப்படுகின்றார். இது தவிர இவர் பற்றிய வேறு தகவல்களும் அதிகம் இல்லை எனலாம். மிகப் பழங்காலத்து நூலாக இருப்பினும் இன்றுவரை தமிழ் இலக்கண விதிகளுக்கான அடிப்படை இதுவேயாகும்

இது தோன்றிய காலம் பற்றிய எல்லோரும் ஏற்றுக்கொள்ளக்கூடிய காலக்கணிப்பு எதுவும் இது வரை இல்லை. பல்வேறு காலகட்டங்களில் பல ஆய்வாளர்கள் வெவ்வேறு விதமாக இதன் காலத்தைக் கணிக்க முயன்றுள்ளார்கள். பண்டைக்காலத்தில் பாண்டிய நாட்டில் இருந்து தமிழ் வளர்த்ததாகக் கருதப்படும் மூன்று [[தமிழ்ச் சங்கம்தமிழ்ச் சங்கங்க]]ளில் இடைச் சங்க காலத்தின் இறுதியில் இந் நூல் எழுதப்பட்டதாகச் சிலர் கருதுகிறார்கள். இதன் அடிப்படையிலும், [[இறையனார் களவியல் உரை]] என்னும் நூலில் காணப்படும் மேற்படி சங்கங்கள் செயற்பட்ட கால அளவுகளை அடிப்படையாகக் கொண்டும், தொல்காப்பியம் கி.மு 5000 ஆண்டளவில் ஆக்கப்பட்டது என்று இவர்கள் கணித்தார்கள். எனினும் தற்காலத்தில் பெரும்பாலான ஆய்வாளர்கள் இதனை ஏற்றுக்கொள்வதில்லை. [[தெ. பொ. மீனாட்சிசுந்தரம்]], இலக்குவனார் போன்றவர்கள் இந்நூல் கி.மு 700 ஆம் ஆண்டளவில் ஆக்கப்பட்டதாகக் கருதினார்கள். வேறு சிலர் இதன் காலத்தை கி.மு 500 க்குச் சிறிது முன்பின்னாகக் கணிப்பிட்டார்கள். சென்னைப் பல்கலைக்கழகத்தில் தமிழ் ஆராய்ச்சித் துறைத் தலைவராகப் பணியாற்றிய எஸ். வையாபுரிப் பிள்ளையும் வேறு சில வெளிநாட்டு அறிஞர்களும் தொல்காப்பியத்தின் காலத்தை மேலும் பின் தள்ளி கி.பி 3 ஆம் நூற்றாண்டு என்றனர். எனினும் இது கிறிஸ்துவுக்கு முற்பட்டது என்பதே பெரும்பாலானவர்களின் கருத்தாகும். ( நன்றி விக்கி பீடியா )

முதலில் எழுத்ததிகாரம் :

எழுத்தின் இலக்கணம் கூறப்படுவது. தமிழ் எழுத்துகள் பெரும்பாலும் ஒலியெழுத்திலக்கணத்தைச் சார்ந்தது. சில இடங்களில் தொல்காப்பியர் வரிவடிவம் பற்றியும் கூறியிருக்கிறார். அதற்கு முன்னால் சிறப்பு பாயிரம் சொல்லப் படுகிறது.

சிறப்பு பாயிரம் என்பது ஒரு நூலின் முன்னுரை போன்றது.

சிறப்பு பாயிரம்
****************

வடவேங்கடம் தென்குமரி
ஆஇடைத்
தமிழ் கூறும் நல் லுலகத்து
வழக்கும் செய்யுளும் ஆஇருமுதலின்
எழுத்தும் சொல்லும் பொருளும் நாடிச்
செந்தமிழ் இயற்கை சிவணிய நிலத்தொடு
முந்து நூல்கண்டு முறைப்பட எண்ணிப்
புலம் தொகுத்தோனே போக்கறுப்பனுவல்
நிலம் தரு திருவில் பாண்டியன் அவையத்து
அறம் கரை நாவின் நான் மறை முற்றிய
அதங்கோட்டு ஆசாற்கு அரில்தபத்தெரிந்து
மயங்கா மரபின் எழுத்து முறை காட்டி
மல்கு நீர் வ்ரைப்பின் ஐந்திரம் நிரைந்த
தொல்காப்பியன் எனத் தன்பெயர் தோற்றிப்
பல்புகழ் நிறுத்த படிமையோனே.

*****

மேலுள்ள இந்த பாயிரத்தை எழுதியவர் பனம்பாரனார் ஆவார்.

அதாவது வடக்கே வேங்கடமும் தெற்கே குமரியும் ஆன எல்லைக்குள் தமிழ் தந்து, தமிழர்கள் வழக்கையும், செய்யுள் வழக்கையும் நன்குணர்ந்து எழுத்து சொல் பொருள் என்ற மூவகைப் பொருளையும் தெளிவுறத் தெரிந்து

செந்தமிழ் இயற்கையாக வழங்கும் பகுதியில் இதற்கு முன்பு வந்த நூல்களை எல்லாம் முறையாகக் கற்று அதைத் தொகுத்து என்றும் நிலைபெறுகின்ற நூலாக அமைத்து நிலம் தரு திருவில் பாண்டிய மன்னன் அவையில் அறத்தை உணர்ந்த உணர்த்துகின்ற, நான்கு மறைகளை உணர்ந்த அதங்கோட்டு ஆசான் தலைமையில் புலவர் கூடைய பேரவையில் மயக்கமின்றி தெளிவாகத் தான் உணர்ந்து பிறர்க்கு எழுத்து முறையைக் காட்டி கடல் சூழ் உலகத்து ஐந்திரம் எனும் நூலையும் உணர்ந்தறிந்து தன் பெயரை தொல் காப்பியன் என்ற வைத்துக் கொண்டு இந்நூலால் பல சிறப்புகள் பெற்ற தூமையானவர்

*************

தொடரலாம் ....